7. apríl 2026

BM Vallá fjárfestir í fimm nýjum rafknúnum Mercedes-Benz eActros 600 vörubílum

Sífellt fleiri fyrirtæki horfa til rafknúinna lausna

BM Vallá hefur fest kaup á fimm nýjum rafknúnum Mercedes-Benz eActros 600 vörubílum sem lið í áframhaldandi vegferð fyrirtækisins í átt að aukinni sjálfbærni og minni losun í rekstri. Með fjárfestingunni styrkir fyrirtækið innviði sína fyrir umhverfisvæna flutninga og dregur úr kolefnisspori starfseminnar.

Rafvæðing flutninga verður stór þáttur í umhverfisstefnu BM Vallár, þar sem lögð er áhersla á að draga úr losun og nýta nýjustu tækni til að bæta rekstur og umhverfisárangur. Nýju bílarnir munu gegna mikilvægu hlutverki í daglegum flutningum fyrirtækisins.

Mercedes-Benz eActros 600 er hannaður með flutninga í huga og býður upp á allt að um 500 km drægni á einni hleðslu. Bíllinn nýtir nýjustu rafhlöðu- og orkustýringartækni, sem gerir hann vel til þess fallinn að mæta kröfum nútíma flutninga – jafnvel við krefjandi íslenskar aðstæður.

„Það er ánægjulegt að sjá íslensk fyrirtæki taka rafvæðingu flutninga föstum tökum. eActros 600 hefur vakið athygli fyrir góða drægni og áreiðanleika, og hefur þegar sýnt að hann hentar vel þeim aðstæðum sem hér eru,“
segir Eiríkur Þór Eiríksson, framkvæmdastjóri Landfara.

Hjá BM Vallá hefur markvisst verið unnið að því að bæta umhverfisárangur starfseminnar, bæði í framleiðslu og flutningum. Innleiðing rafknúinna vörubíla er liður í þeirri stefnu.

„Við viljum vera í fararbroddi þegar kemur að ábyrgum og umhverfisvænum rekstri. Með þessum nýju rafknúnu bílum erum við að þróa flutningakerfið okkar í átt að minni losun og aukinni skilvirkni, í samræmi við okkar stefnu um sjálfbærni,“
segir Þorsteinn Víglundsson, framkvæmdastjóri BM Vallár.

Kaup BM Vallár endurspegla þá þróun sem nú á sér stað í íslensku atvinnulífi þar sem sífellt fleiri fyrirtæki horfa til rafknúinna lausna í flutningum sem raunhæfan og hagkvæman kost til framtíðar.

Um BM Vallá

BM Vallá er eitt af leiðandi byggingarefnafyrirtækjum landsins og framleiðir meðal annars steypu og forsteyptar einingar. Fyrirtækið leggur ríka áherslu á sjálfbærni, nýsköpun og að lágmarka umhverfisáhrif starfseminnar.

Um Landfara

Landfari er umboðsaðili Mercedes-Benz atvinnubíla á Íslandi og veitir lausnir á sviði flutningatækja, þjónustu og ráðgjafar. Fyrirtækið hefur lagt áherslu á að styðja við orkuskipti í flutningum með innleiðingu rafknúinna bíla á íslenskum markaði.